Փարիզում առաջիկա ամռանը կայանալիք 33 –րդ օլիմպիական խաղերին կծառայեն  35 մրցավայրեր:  Դրանցից 14-ը գտնվում են օլիմպիական ավանից հեռու՝ 10 կմ  շառավղով։ 

Կառույցների մեծ մասն արդեն պատրաստ  է:

Մրցումների մի մասը կանցկացվի Ֆրանսիայի մայրաքաղաքին հարող տարածքներում:

Ֆուտբոլի  մրցաշարի հանդիպումները կկայանան Բորդո, Նանտ, Լիոն, Սենտ Էտյեն, Նիս և Մարսել քաղաքների մարզադաշտերում, սյորֆինգի ստուգատեսը՝    Թաիթի նահանգի Թեահուպու քաղաքում։

Ներկայացնենք Ստադ Դե Ֆրանս ստադիոնը / Stade de France /:  Այն գտնվում է Փարիզի հյուսիսային Սեն-Դենի արվարձանում։ Կառուցվել է 1998թ. Ֆրանսիայում անցկացված  ֆուտբոլի աշխարհի առաջնության համար:

Ներկայում ասպարեզն օգտագործվում է երկրի խոշորագույն սպորտային իրադարձությունների, մասնավորապես ֆուտբոլի և ռեգբիի   հանդիպումների համար։ 

Մարզադաշտի կոնֆիգուրացիան թույլ է տալիս  ընդունել նաև աթլետիկայի մրցումների մասնակիցներին: Այնտեղ տեղի է ունեցել 2003թ.  աշխարհի առաջնությունը, իսկ «Meeting Areva» մրցաշարն անցկացվում է ամեն տարի։ 

Ասպարեզը տեղավորում է 75,000 - 90,000 հանդիսական՝  կախված միջոցառման բնույթից: